El Gobiernu del Principáu d’Asturies va promocionar la llingua asturiana nel alcuentru ‘Expolangues’, que los próximos díes 6, 7, 8 y 9 de febreru va tener llugar en París. Trátase d’un salón internacional d’idiomes y llingües falaes en tol mundiu, tanto con carácter mayoritariu como minoritariu. Asturies va contar col so ‘stand’ propiu.
Anunciólo güei la directora xeneral de Promoción Cultural y Política Llingüística, Consuelo Vega, nuna ruda prensa na que tuvo acompañada por Marga Magadán, voceru del Gremiu d’Editores Asturianos, entidá qu’aconceya a les 24 empreses editores d’Asturies, y que tamién va tener la so representación nel ‘stand’ asturianu de París. L’Academia de la Llingua tamién collabora na organización d’esta delegación.
A París, el Principáu va dir provisto de della información documental. La más destacada va ser un folletu informativu, escritu n’asturianu y tornáu, per un allu al inglés, francés y almenán, y per otru al catalán, euskera y gallegu, nel que s’esplica’l conceutu, l’orixe, la historia y la situación actual de la ‘llingua’ asturiana y de la so producción lliteraria, cifrando’l númberu actual de falantes en más de 250.000.
Tamién va mostrase material lliterariu n’asturianu y castellán, asina como información sobre Asturies, la so naturaleza y el so paisaxe. El ‘stand’ va inaugurase’l día 6 a les 18 hores nel Parc Expo de París, nel que va tener llugar el salón internacional. Nel actu d’abertura, amás de Vega y Magadán, van tar presentes ente otros, la presidenta de l’Academia de la Llingua, Ana Cano, y el poeta Pablo Antón Marín Estrada, ganador del premiu de poesía n’asturianu Xuan María Acebal 2007. Obsequiaráse a los visitantes con un llibrín con cinco de los sos poemes inéditos, y va realizase un recital llíricu.
Vega destacó la importante oportunidá de “promoción internacional de la ‘llingua'” que supón esti foru, “nel que van tar representaes llingües de tol mundiu, con embaxaes d’idiomes más y menos falaes”.

IMPORTANTE PRODUCCIÓN N’ASTURIANU.
Marta Magadán aprovechó la ocasión pa destacar la “calidá” del trabayu editorial que se fai n’Asturies, “tanto nel arte del diseñu de les cubiertes como nos conteníos ellaboraos polos nuesos escritores”. En ‘Espolangues’, esplicó, “vamos dar una visibilidá y una promoción mui importante al nuesu trabayu”.
En total son 24 les empreses editores integrantes del Gremiu, de les cuales Magadán recordó que 14 publiquen llibros n’asturianu. “Ye un trabayu que se realiza porque apostamos por él y creemos nél, a pesar de que’l llector potencial seya reducíu”, reñaló.

A %d blogueros les gusta esto: